हङकङय् नं बुद्ध जयन्ती र्याली
येँ (सन्ध्या टाइम्स)/नेपालय् बुद्ध जयन्तीया तयारीइ थीथी कथंया ज्याझ्वःत शुरु जू थें हङकङय् नं बुद्ध जयन्ती र्याली आः नकतिनि हे क्वचाःगु दु। उगु शान्ति र्यालीइ हङकङय् च्वंपिं नेपाःमितय्सं ब्वति काःगु खः ।
वंगु मंगलाः कुन्हु जोर्डन लागाया काउलुन पार्कं न्ह्याःगु उगु शान्ति र्यालीइ नेपाःमितय्गु तःधंगु उपस्थिति खनाः अनया स्थानीय चिनियाँवासी व प्रहरी नं अजूचाःगु खः। र्यालीइ ब्वति काःपिंसं अंग्रेजी व चिनियाँ भाषां 'बुद्ध नेपालय् बूम्ह खः' धकाः च्वयातःगु ब्यानरया प्रदर्शनी नं याःगु खः ।
करिब स्वसःम्ह नेपाःमि व चिनियाँतय्सं ब्वति काःगु उगु शान्ति र्याली हङकङया तमु एसोसियसनया ग्वसालय् न्ह्याःगु खःसा हङकङ नेपाली महासंघ, एनआरएन व नेपाल चेम्बर अफ कमर्श हङकङं नं ग्वाहालि याःगु खः ।
