संविधानसभाया म्याद हानं दच्छि थप यायेगु निर्णय
सत्तारुढ स्वंगू दलं संविधानसभाया म्याद हानं दच्छिया निंतिं थप यायेगु निर्णय या:गु दु ।
सिंहदरवारस्थित प्रधानमन्त्रीया ज्याकूथीइ जूगु एनेकपा (माओवादी), नेकपा (एमाले) व मधेशी जनअधिकार फारेमया मुँज्याय् स्वंगू दलं दच्छि थप यायेगु निर्णयलय् सहमति प्वंकूगु खः । टर्की भ्रमण क्वचायेकाः थौं निंतिं येँ थ्यंकादीम्ह प्रधानमन्त्री झलनाथ खनालं थौं हे मन्त्रिपरिषद्या मुँज्या सःता संविधानसभाया म्याद दच्छि थप यायेगु निर्णय पारित याइगु ज्याझ्वः दु ।
स्वंगू सत्तारुढ दलत दथुइया मुँज्या लिपा प्रधानमन्त्री खनालं उगु विषयलय् सहलह यायेत संविधानसभाय् दुथ्याःगु नीन्हय्गू दलया मुँज्या सःतुगु खः । मुँज्या ब्वति काःपिं अधिकांश नेतातय्सं शान्ति व संविधानया निंतिं विश्वासनीय कार्ययोजन मवयेकं संविधानसभाया म्याद थप यायेमज्यूगु सुझाव बिउगु खः ।
नेपाली कांग्रेस व संयुक्त मधेशी मोर्चा आवद्ध स्वंगू दलं ब्वति मकागु उगु मुँज्याय् सत्तारढ दलतय्सं याकनं हे सेना समायोजन लगायत शान्ति व संविधानया कार्ययोजना न्ह्यब्वयेगु खँ धाःगु खः ।
थौं च्वनीगु मन्त्रिपरिषदया मुँज्यां संविधानसभाया म्याद दच्छि थप यायेगु निर्णय पारित यानाः म्याद थप यायेगु बारे विधेयक याकनं हे संसदय् यंकीगु जूगु दु ।
