थ्वहे सरकारं मिसन पूवंकी : प्रम
प्रधानमन्त्री झलनाथ खनालं वर्तमान सरकार छगू निश्चित मिसन ज्वना वःगुलिं उगु मिसन पूमवंक थ्व सरकार ल्यून मवनीगु दावी यानादिल ।
टर्की भ्रमण चिहाकः यानाः थौं येँय् लिहांझायादीम्ह प्रधानमन्त्री खनालं थः छगू मिसन ज्वना सरकारय् वयागुलिं उगु मिसन थःगु हे नेतृत्वया सरकारं पूवंकीगु दावी यानादिल । सरकार थःगु दायित्व पूवंकेत दृढ दुगु धयादिसें वय्कलं सुनां धायेवं हे थःम्ह राजीनामा मबीगु धयादिल ।
लोकतन्त्रय् दक्वसितं थःथःगु बिचाः प्वंकेगु स्वतन्त्रता दुगु टिप्पणी यानादिसें प्रधानमन्त्री खनालं थःगु राजीनामा फ्वनीपिं संविधान विरोधी जूगु द्वपं बियादिल ।
जेठ १४ दुनेया ईयात शान्ति प्रक्रिया क्वचायेकेत थःम्ह फक्वः कुतः यायेगु धयादिसें प्रधानमन्त्री खनालं ल्यँ दुगु इलय् संविधान निर्माण यायेमफुसा ई थप यायेमफइगु संकेत बियादिल ।
टर्कीया इस्तानबुलय् जूगु अतिकम विकसित राष्ट्रतय् प्यक्वःगु सम्मेलनय् ब्वति कयाः येँय् थ्यंकादीम्ह प्रधानमन्त्री खनालयात उपप्रधान नापं अर्थमन्त्री भरतमोहन अधिकारीं त्रिभुवन अन्तराष्ट्रिय विमानस्थलय् लसकुस यानादीगु खः ।
