थारुतय्सं याःगु तराई बन्दं जनजीवन प्रभावित
नेपाल आदिवासी महासंघया ग्वाहालिइ थारु कल्याण्कारिणी सभां याःगु तराई बन्दया हुनिं अनया जनजीवन प्रभावित जूगु दु ।
सरकारं थःपिंनाप याःगु सहमति अःख मधेशी जनअधिकार फोरमनाप मेगू सहमति याःगु धासें सभां निन्हुन्यंकया तराई बन्दया आव्हान याःगु खः । सरकारं फोमरनाप याःगु सहमतिइ तराईलय् च्वपिं फुक्कसितं मधेशी धयात:गु व तराईयात छगू मधेश प्रदेश यायेगु धकाः न्ह्यथनातःगु धासें थारु समुदायं उकिया विरोध स्वरुप बन्द याःगु खँ धाःगु दु ।
बन्दया न्हापांगु न्हि थारुतय् बाहुल्य दुगु तराईया बर्दिया, कैलाली, कञ्चनपुर, बाँके, रुपन्देही, दाङ, चितवन, नवलपरासी, सुनसरी, मोरङ, सिराहा, उदयपुर लगायत जिल्लाया जनजीवन प्रभावित जूगु दु । अन चिहाकःगु व ताःहाकःगु दुरुया यातायात पूर्ण रुपं ठप्प जूगु दुसाः पसः, ज्याकू, शिक्षणसंस्था, कलकारखाना आदि बन्द जूगु दु ।
उखे क्षेत्री समाजं नं थौं सुदूरपश्चिम बन्दया आव्हान याःगु दु । बन्दया हुनिं डोटी, अछाम, बझाङ, दिपायल लगायत थाय्या जनजीवन प्रभावित जूगु दु ।
