अरुण-३ नं जग्गाया भाः थकया बिल
येँ (सन्ध्या टाइम्स)/धायेबलय् पत्याः जुइ थाकुइ, तर सत्य छु धायेबलय् स्वनिगलय् जग्गाया कारोवार याइपिं क्वांक्वां ख्वयाच्वंगु इलय् नं पूर्वी नेपाःया खाँडवारीइ धाःसा जग्गाया भाः न्हियान्हिथं थहां वयाच्वंगु दु। संखुवासभाया सदरमुकाम खाँडवारी धइगु छुं दँ न्ह्यः तिनि नगरपालिका घोषणा जूगु थाय् खः। अन गाडी चले जूगु तकं ताः ई मदुनि। अनया भानु चोक धाःथाय् थौंकन्हय् जग्गाया भाः थुलि थिके जुयाच्वंगु दु कि प्रति मिटर १० लाख तका थ्यनाच्वंगु दु। अनया जग्गाया नाप कथं ४ मिटर धाल कि स्वनिगःया १ आना १ पैसा जू वइ। थ्व ल्याखं अन स्वनिगलय् सिबें नं तसकं जग्गा थिके जूगु खनेदु ।
स्थानीय मनूतय्सं धाः कथं उगु लागाय् लाःगु अरुण-३ जलविद्युत परियोजना दयेकीगु चर्चा व किमाथांका जुयाः तिब्बत तक वनीगु राजमार्ग चालीन धइगु चर्चां यानाः थ्व भाः थहां वनाच्वंगु खः। उगु थासय् एंला (अलैंची) या व्यापार याइपिं मनूत फुकस्यां ब्यापारं मुंगु दामं जग्गा हे न्यायेगु ज्या यानाच्वंगु दु ।
उखे येँय् धाःसा जग्गाया ज्या याइपिंत मिया बिउ धाइपिं ग्वाःग्वाः दयाः न्याइपिं धाःसा पिहां मवयाः समस्या जुयाच्वंगु खँ सीदुगु दु ।
