फोरम थःगु हे नेतृत्वया सरकारयया पक्षय्
सत्ता समिकरणय् महत्त्वपूर्ण ल्हाः दुगु मधेशी जनअधिकार फोरमं थःगु हे नेतृत्वया सरकार गठनया निंतिं पहल यायेगु व अथे मजूसाः मधेशया मागयात सम्बोधन यायेत प्रतिबद्धता प्वंकेगु गठबन्धनयात सरकार देयेकेत पिने च्वनाः हे समर्थन यायेगु निर्णय याःगु दु ।
शुक्रवाः सुथय् प्यताः ईलय् तक च्वंगु फोरमया केन्द्रीय समितिया बैठकं शान्ति प्रक्रियायात तार्किक निष्कर्षय् थ्यंकेत व राजनीतिक सहमतिया आधारय् लोकतान्त्रिक मूल्य व मान्यताया लिधंसाय् राज्य प्रणाली सु-संचालन यायेत फोरमं थःगु हे नेतृत्वय् सहमत जुइफुगु पक्षत नाप मंकाः सरकार गठनया निंतिं राजनीतिक दलतय् सहमति मुंकेगु निर्णय याःगु दु ।
अथेहे मेगू विकल्पय् कथं संयुक्त लोकतान्त्रिक मधेशी मोर्चानाप जूगु च्यागू बुँदे सम्झौतायात ठोस व व्यवहारिक रुपं कार्यान्वयन यायेत सहमति प्वंकेगु राजजीतिक दल वा गठबन्धनयात सरकार गठन यायेत समर्थन यायेगु निर्णय याःगु दु । थंज्याःगु दल वा गठबन्धनयात समर्थन यायेत फोरम स्वयम सरकारय् मवंसें पिनेच्वनाः हे समर्थन व ग्वहालि यायेगु निर्णय याःगु दु ।
मोर्चाया निगू घटक तमलोपा व सद्भावनां एमाले गठबन्धनयात ग्वहालि यायेगु निर्णय थ्वस्वयां न्ह्य: हे यायेधुंकूगु दु ।
