थुगुसी १५०० मनुखं सगरमाथा गइगु

येँ (सन्ध्या टाइम्स)/विश्वया दकलय् तजाःगु च्वापुगुँ सगरमाथा गयेगु ज्या नं आः साहस मखु फेशन जुया वःगु दु। सगरमाथा गइपिं मनूत दँय्दसं हे अप्वयाच्वंगु दु। थुगु सिजनय् जक सगरमाथा गयेगु लागिं २६ गू पुचलं अनुमति कायेधुंकूगु दु। छगू पुचलय् १० निसें १५ म्ह त आरोही दइ। भरिया व मेपिं नापं यायेबलय् थ्व ल्याः २५ म्ह तक नं थ्यनेफु। थ्व ल्याखं थ्व सिजनय् जक करिब १५०० म्ह मनूतय्सं सगरमाथाया च्वकाय् पलाः तयेगु कुतः यानाच्वंगु दु ।

थ्व व्यवसायय् लगे जुयाच्वंपिं मनूतय्सं धाः कथं सगरमाथा गयेगु धइगु आः न्हापा थें थाकुगु विषय मखयेधुंकल। च्वका तक वनेगु लँ यक्व दयेकेधुंकूगु, नापं वनीपिं सरदारत तसकं अनुभवी जुया वःगु व थाकुगु लँय् ध्यबा कयाः ताँ दयेका बीपिं मनूत उपलब्ध जुइगु कारणं यानाः सगरमाथा गयेगु अःपुया वःगु दु ।

सगरमाथा गयेगु ज्यायात सहज रुपं काइगु व जिं नं गयेफु धकाः जबर्जस्ती हे गः वइगु कारणं यानाः नं सगरमाथा गइपिं अप्वयाच्वंगु खँ सम्बन्धित व्यवसायी शेर्पातय्सं धाःगु दु ।

थुगुसी नेपाःया १३ म्ह निजामति कर्मचारीतय् छगू पुचलं नं सगरमाथा आरोहण यानाच्वंगु दुसा आप्पां शेर्पां २१ औं आरोहण यानाच्वंगु दु ।

सगरमाथाया च्वकाय् च्वनाः न्हापांगु ट्वीट
सगरमाथाया सफल आरोहण याःम्ह बेलायती आरोही केन्टोन कुलं सगरमाथाया च्वकाय् च्वनाः ट्वीटरपाखें थःगु सन्देश प्रवाह याःगु दु। सगरमाथाया च्वकां ट्वीट याःगु थ्व इतिहासय् हे न्हापांखुसी खः। आः तक गुक्वः सगरमाथा गयेधुंकूम्ह केन्टोनं न्हापांगु ट्वीट यायेधुंकाः थ्व नं छगू कीर्तिमान हे खः धाःगु दु ।

केन्टोनया थुगु आरोहणया प्रायोजन दक्षिण कोरियाया सामसुंग कम्पनीं याःगु खः। ट्वीटया गुणस्तर बांलाक हे वःगु खः ।

शैलेन्द्रकुमारया सीम्ह थौं येँय् हइगु
८२ दँय् सगरमाथा गः वंम्ह पुलांम्ह मन्त्री शैलेन्द्रकुमार उपाध्यायया लाश थौं जक येँय् हइगु जूगु दु। वय्कःया सीम्ह सगरमाथाया बेस क्याम्पय् हयातयेधुंकूगु दु। भाजु उपाध्याय नुगःचु तज्यानाः सीगु जुइमाः धकाः चिकित्सकतय्सं अनमान याःगु दु ।