बुद्ध जयन्तीया लसताय् धार्मिक सभा
येँ (सन्ध्या टाइम्स)/२५५५ क्वःगु बुद्ध जयन्तीया लसताय् बौद्ध महिला संघ नेपालं थनया भृकुटी मण्डपय् छन्हुया धार्मिक सभाया आयोजना याःगु दु। श्रद्धेय भिक्षु कुमार काश्यप महास्थवीरया सभापतित्वय् न्ह्याःगु उगु ज्याझ्वलय् लुम्बिनी विश्व विद्यालयया उपकूलपति डा. त्रिरत्न मानन्धर मूपाहांकथं झाःगु खः ।
ज्याझ्वलय् भिक्षु ज्ञानपूर्णिक महास्थवीरं धर्म देशना यानाबिज्यासें 'अप्पमादेन संपादेथ' या महत्व बारे कनाबिज्याःगु खः। लिसें वसपोलं अप्रमादी स्वभावया विशेषताया बयान यासें स्वभाव ग्रहणया स्मृतिया आवश्यक जू धइगु खँय् नं बः बियाबिज्याःगु खः ।
ज्याझ्वलय् मूपाहां डा. त्रिरत्न मानन्धरं संघं परोपकारया केन्द्रय् संचालित परियत्ति शिक्षाय् उत्तीर्ण जूपिं मुक्कं सुइम्ह ब्वँमिपिंत सिरपाः इनेज्या नं जूगु खः। बुद्ध धर्मया शिक्षाय् जागरुकता हयेगु निंतिं बौद्ध महिला संघं नेपालय् यानाच्वंगु ज्या प्रशंसनीय जूगु खँ नं वय्कलं कनादिल।
ज्याझ्वलय् संघया अध्यक्ष बासन्तिदेवी बज्राचार्यं लसकुस यानादीगु खःसा उपाध्यक्ष डा. केशरीलक्ष्मी मानन्धरं सुभाय् बियादीगु खः। ज्याझ्वलय् परियत्ति शिक्षाय् उत्तीर्ण जुयादीपिं मध्ये मय्जु सुष्मा तामाङ्गं थःगु अनुभव न्यंकादीगु खः ।
