ज्ञानमाला भजन खलःया न्हूधाः
येँ (सन्ध्या टाइम्स)/ज्ञानमाला भजन खलःया न्हूगु ज्यासना पुचः (कार्यसमिति) या सपथ ग्रहण ज्याझ्वः वंगु शनिवाः क्वचाल। ज्याझ्वः आनन्दकुटी विहारया सरङकर भन्तेया सभापतित्वय् न्ह्याःगु खःसा वसपोलं हे शील प्रार्थनालिसें ज्याझ्वः न्ह्याकूगु खः ।
ज्याझ्वलय् ल्यज्या कवःया नायः मुकुन्द श्रेष्ठं निर्विरोध अध्यक्ष लगायत सकल पदाधिकारी व दुजःपिंत दसिपौ नं लःल्हानादीगु खः। ज्याझ्वलय् निवर्तमान नायः रत्नबहादुर राजकर्णिकारं पदाधिकारी व दुजःपिंत खादागा क्वखायेकाः भिंतुना बियादीगु खः।ज्याझ्वलय् वर्तमान अध्यक्ष पुण्य शाक्य, सचिव पूर्णकाजी ज्यापू, सल्लाहकार सर्वज्ञरत्न तुलाधरपिंसं थःथःगु नुगःखँ तयादीगु खः। थुकिया लिसें न्हूगु कार्यसमितियात ज्ञानमाला भजन खलः स्वयम्भूया आजीवन जः पासापिं लगायत धर्म पासापिंसं नं भिंतुना बियादीगु खः। ज्याझ्वलय् निवर्तमान उपाध्यक्ष दिब्यतारा तुलाधरं लसकुस यानादीगु खःसा निवर्तमान सचिव रमेश मानन्धरं सुभाय् बियादीगु खः ।
