माओवादी संसद अवरुद्ध यानाच्वनेगु पक्षय् मदु : प्रचण्ड
प्रधानमन्त्री व एकीकृत नेकपा (माओवादी)या अध्यक्ष पुष्पकमल दाहालं न्हूगु सरकार गठन यायेत पंगः मथनेगु न्ह्यथंसें माओवादी संसद अवरुद्ध यानाच्वनेगु पक्ष मदुगु धयादिल । वयेकलं शान्ति व न्हूगु संविधान निर्माण यायेगु ज्या पूवंकेत बृहत राजानीतिक सहमतिया निंतिं दक्वं दलतय्त इनाप यानादिल ।
माओवादी जनयुद्धया बारे पत्रकार दिपक सापकोटां च्वःगु 'उथलपुथलका दश वर्ष' सफू विमोचन यायेगु ज्याझ्वलय् वयेकलं हाकनं नाप्पं च्वना: बृहत राष्ट्रिय सहमति यानाः शान्ति व संविधान निर्माणया मुद्दाया बारे सहलह यायेमाःगु खँ धयादिल ।
वयेकलं इतिहाया मुलभूत मुद्दायात छखे तयाः राजतन्त्रया कासाः म्हिताः हाकनं निरंकुशसता पाखे लिहांवनेगु कुतः जुयाच्वंगु द्वपं बियादिल । देय् गृहयुद्ध पाखे यंकेत स्वःसाः राष्ट्रया निंतिं तःधंगु दुर्भाग्य जुइगु धयादिल । आत्मनिर्णयया अधिकार व शान्तिया संघर्ष जारी दुगु धासें वयेकलं रिमोट कन्ट्रोल पाखें नेपाःयात संचालन यायेत स्वईपं पाखें सचेत जुइत दक्वसितं इनाप यानादिल ।
प्रधानमन्त्री प्रचण्डं आःया मुद्दा स्वसः व छगू सिटया सांसदत मुंकाः सरकार देयेकेगु मखसें अत्मनिर्णयया अधिकार स्थापित यायेगु खः धयादिल । जननिर्वाचित सरकारयात निरिह यायेगु कथं न्ह्या: वंसाः अज्याःगु सरकारया छुं अर्थ मदइगु धयादिल ।
