कांग्रेस नेतात व नेपाल-ओली पुचः दथुइ वार्ता
वर्तमान झलनाथ खनाल नेतृत्वया सरकार क्वःथला न्हूगु सरकार निर्माण यायेगु विषयलय् नेपाली कांग्रेसया नेतात व नेकपा (एमाले)या माधवकुमार नेपाल व केपी शर्मा ओली पक्षया नेतात दथुइ खँल्हाबंला जूगु दु ।
प्रधानमन्त्री झलनाथ खनाल टर्कीया भ्रमणय् दुगु इलय् वय्कः प्रति असन्तुष्ट नेपाल-ओली पुचलं कांग्रेस नेतातनाप न्हूगु सत्ता समिकरणया विषयलय् सहलह न्ह्याकूगु खः । निगू पक्ष दथुइ जूगु वार्ताय् जेठ १४ गते न्ह्यः हे राष्ट्रिय सहमतिया सरकार निर्माण यायेमाःगु खँय् सहलह जूगु खः ।
नेपाल-ओली पुचलं थ्वस्वयां न्ह्यः हे प्रधानमन्त्री खनालं राजीनामा बियाः राष्ट्रिय सहमतिया सरकार निर्माणया निंतिं मार्ग प्रशस्त यायेमाःगु बिचाः प्वंकावयाच्वंगु खः ।
वार्ताय् सरकराया विकल्प मालेगु व शान्ति प्रक्रियायात जेठ १४ गते न्ह्यः हे क्वचायेके माःगु बारे सहलह जूगु खः । निगूलिं पक्षं आःया हे अवस्थाय् संविधानसभाया म्याद थप याये मज्यूगु खँय् सहमति प्वंकूगु दु ।
निगू पक्ष दथुइ जूगु सहलहलय् कांग्रेसपाखें कृष्ण सिटौला, डा. रामशरण महत, मिनेन्द्र रिजाल, विमलेन्द्र निधि व एमालेपाखें माधवकुमार नेपाल, केपी ओली, ईश्वर पोखरेल, प्रदीप ज्ञवाली लगायत नेतातय् ब्वति दुगु ख: ।
