थ्व फुक्क हे प्रचण्डया लीला !
येँ (सन्ध्या टाइम्स)/राष्ट्रिय सहमति कायम यायेगु धकाः एमाले अध्यक्ष झलनाथ खनालया नेतृत्वय् सरकार गठन जुल। थ्व सरकार गठन यायेगु ज्याय् दकलय् तःधंगु ल्हाः दुम्ह सुं खःसा व माओवादी अध्यक्ष प्रचण्ड हे जक खः। तर सरकार गठन जूगु सछिन्हु हे मदुनि, थ्व सरकार जेठ १४ गते न्ह्यः हे क्वःदलीगु चर्चा शुरु जूगु दु। तर सूत्रतय्सं बिउगु जानकारी कथं जेठ १४ गते न्ह्यः हे थ्व सरकार क्वःथलेगु धकाः जूगु चर्चाया लिउने नं मेपिं सुं मखु स्वयम प्रचण्डया हे ल्हाः दु ।
प्रम झलनाथ खनाल व प्रचण्डया दथुइ जूगु सहमति कथं वय्कःपिं निम्हेस्यां पालंपाः सरकारया नेतृत्व यायेगु जुइ। अय् जुयाः छुं जुयाः जेठ १४ न्ह्यः हे थ्व सरकार क्वःदल धाःसा वयां लिपा प्रधानमन्त्री जुइगु पाः ला प्रचण्डयागु हे खः। वहे कारणं यानाः प्रचण्डं जेठ १४ न्ह्यः हे सरकार क्वःथलेगु लागिं थ्व फुक्क 'लीला' क्यनाच्वंगु सूत्रया दावी दु ।
सरकारं ताः ई तक नं पूर्णता काये मफयाच्वंगु, पूर्णता कालं नं पार्टी दुने हे कचवं पिहां वयाच्वंगु आदि फुक्क ज्याया लिउने प्रचण्डया ल्हाः दुगु खँ सूत्रं धाःगु दु ।
थ्वहे झ्वलय् एमाले दुने झलनाथ खनालया प्रतिद्वन्द्वी जुयाच्वंम्ह केपी ओलीं आः जेठ १४ गते न्ह्यः हे प्रधानमन्त्रीं राजीनामा बिउसा बेश जुइ धयाहःगु दु। ओलीं अथे धकाः न्ववाः कुन्हु हे प्रचण्ड व ओली दथुइ नं खँल्हाबल्हा जूगु दु। वय्कःपिनि दथुइ जूगु खँल्हाबल्हाया फुक्कं खँ पिहां वःगु मदुनि। सरकारयात राष्ट्रिय स्वरुप बियाः न्ह्याः वनेमाः धइगु विषयय् वय्कःपिनि दथुइ खँल्हाबल्हा जूगु खँ सूत्रं धाःगु दु। देशय् प्रधानमन्त्री मदुगु इलय् वय्कःपिनि दथुइ थ्व खँल्हाबल्हा जूगु खः ।
