माओवादी मजदूर दथुइ हानं ल्वापु
येँ (सन्ध्या टाइम्स)/माओवादी दुनेया लाइन संघर्षया झ्वलय् विभाजित जूपिं माओवादी मजदुरतय् दथुइ ल्वापुया झ्वलय् अध्यक्ष प्रचण्ड पक्षधर मजदुरतय्सं न्वकु बाबुराम भट्टराई पक्षया मजदुरयात बाम्ह सिक्क दाःगु दु ।
महासंघया येँया क्यासिनो अन्नपूर्ण इकाइया कोषाध्यक्ष भट्टराई पक्षधर ज्ञानमान डंगोलयात प्रचण्ड पक्षधर मजदुरतय्सं वंगु चान्हय् दाःगु खः। प्रचण्ड पक्षया बाबुराम गौतमया नेतृत्वय् कल्पदीप राई, नानीकाजी बस्नेत व किशोर खत्री नापं मेमेपिंसं डंगोलयात दाःगु खः। इमिसं डंगोलयात अमानवीय तरिकां हमला याःगु खँ अखिल नेपाल होटल तथा मजदुर संगठनया अध्यक्ष रमेश पन्तं धाःगु दु। डंगोलया म्हय् वँचुसे च्वंक दाम जक दुसा आः वयात मोडल अस्पतालय् वासः याकातःगु दु। संगठन विरोधी ज्या यात धकाः पार्टी महासचिव रामबहादुर थापा बादलं म्हिगः जक क्यासिनो अन्नपूर्णया होटल मजदुर संगठनया इकाइ अध्यक्ष कल्पदीप राई, दुजःपिं नानीकाजी बस्नेत व किशोर खत्रीयात दच्छिया नितिं संगठनया साधारण सदस्य तकं मजुइ कथं कारवाही यानागु आन्तरिक सर्कुलर छ्वयाहःगु खःसा उगु हे विषययात कयाः कचमच जुइवं उमिसं डंगोलयात आक्रमण याःगु खः ।
माओवादी मजदुर संगठन अखिल नेपाल ट्रेड युनियन महासंघय् ताः ई न्ह्यवंनिसें प्रचण्ड पक्ष व बाबुराम पक्षधर दथुइ ल्वापु जुया वयाच्वंगु खः। पार्टीया लाइन संघर्षया झ्वलय् थौंकन्हय् प्रचण्ड व बाबुराम छथाय् दुसा मेम्ह उपाध्यक्ष मोहन बैद्य किरण धाःसा मेगु हे लाइनय् दु ।
