एमालें तच्वकं द्वंकल : गौतम
निवर्तमान उपप्रधान व गृहमन्त्री बामदेव गौतमं प्रधामसेनापति रुक्मांग कटवालया कारवाही प्रकरणं ल्यूने सरे जुयाः एमालें तच्वकं द्वंकूगु खँ धयादीगु दु ।
बिहिवाः येँय् जूगु अनेरास्ववियूया प्रशिक्षण ज्याझ्वलय् न्ववासें नेता गौतमं माओवादीया उग्रवामपन्थी भड्काव दिकेगु नांमय् प्रधानसेनापति कारवाही प्रकरणय् एमालें याःगु गल्ती पाखें दक्षिणपन्थीयात हे फाइदा जूगु धयादिल । वयेकलं सेना समायोजन व पुर्नस्थापना ज्या सम्पन्न मजुइकं शान्ति प्रक्रिया तार्किक निष्कर्षय् थ्यनी मखु धयादिल । वयेकलं थुकीं संविधान निर्माण यायेगु ज्या तकं प्रभावित यायेफइगु धासें
सेना समायोजन विरोधी प्रधानसेनापति कटवालयात कारवाही यायेगुया विकल्प मदुगु स्पष्ट यानादिल ।
एमाले उपाध्यक्ष नं जुयादिम्ह गौतमं एमालें न्हापा थ्व प्रकरण यात समर्थन याये धयाः नं लिपाः समर्थन लित कायेगु निर्णय पार्टीया गलत दृष्टिकोण जूगु टिप्पणी यानादिसें आः क्रान्तिकारी शक्तित दथुइ सहकार्य यानाः न्ह्याः वनेमाःगु आवश्यकताय् बः बियादिल । क्रान्तिकारी शक्तित नापया सहकार्यं जक एमालेया भविष्य दइगु बीचाः तयादिसें क्रान्तिकारी नारा नालाकाःगु कारणं हे स्वतन्त्र विद्यार्थी युनियनय् थःगु विद्यार्थी संगठन अनेरास्ववियू यक्व विद्यार्थीया जनमत मुंकेत ताः लाःगु धयादिल ।
