नीता घिराइयापाखें ११२ क्वःगु हिदान
येँ (सन्ध्या टाइम्स)/ १४९ औं रेडक्रस दिवस व २५५५ औं बुद्ध जयन्तीया लसताय् संकटा बचत तथा ऋण सहकारी संस्था व नेपाल रेडक्रस सोसाइटी गणबहाः उपशाखाया मंकाः ग्वसालय् वंगु आइतवाः हिदान ज्याझ्वः जुल। नेपाल रेडक्रस सोसाइटी गणबहाः उपशाखाया अध्यक्ष अमृत नारायण मानन्धरया सभापतित्वय् न्ह्याःगु उगु ज्याझ्वलय् मुक्कं ६७ म्हसिनं ब्वति काःगु खःसा ज्याझ्वलय् ब्वति काःपिंत पुलांम्ह मन्त्री पिएल सिंहं हनापौ लःल्हानादीगु खः ।
ज्याझ्वःया विशेष आकर्षणकथं थःपिंसं पाहां मय्जु नीता घिराइयायात कयागु जानकारी नं ग्वसाः खलकं बिउगु दु। मय्जु घिराइयां आः तक ११२ क्वः हिदान यानादीगु खँ ग्वसाः खलकं धाःगु दु ।
ग्वसाः खलकं धाः कथं मय्जु घिराइयायात अखिल भारतीय युवा मञ्च, राँचीं नवौं राष्ट्रिय अधिवेशनय् 'युवा रत्न पुस्कार' नं लःल्हाःगु खः। २८ डिसेम्बर २००८ य् कलाकार शत्रुघन सिन्हाया ल्हातं उगु सिरपाः कयादीम्ह मय्जु घिराइया नेपाः जक मखु विश्वय् हे आःतक दकलय् अप्वः हिदान याःम्ह मय्जु जुयाच्वंगु खने दु। वय्कलं गिनिज बुक अफ वर्ल्ड रेकर्डय् थःगु नां च्वकेगु निंतिं नं कुतः याना च्वनादीगु खँ ग्वसाः खलकं धाःगु दु ।
ज्याझ्वलय् डा. मनिका राजकर्णिकार, सांसद तीर्थराम डंगोल, संकटा बचत तथा ऋण सहकारी संस्थाया अध्यक्ष ईश्वरमान तुलाधर, डिभिजन सहकारी विभागया प्रमुख सुदर्शनप्रसाद ढकालपिं नं उपस्थित जुयादीगु खः।
