येँया पत्रकारत मुनाः पत्रकार समाज स्वन

येँ (सन्ध्या टाइम्स)/पत्रकारतय्गु हकहित व पेशागत सुरक्षायात ध्यानय् तयाः अध्ययन, अनुसन्धान यायेगु मू आज्जुलिसें येँदेय्या क्रियाशील पत्रकारतय्गु अग्रसरताय् 'पत्रकार समाज नेपाल' नीस्वंगु दु। पेशागत सुरक्षा व थुकिया विकासया निंतिं पत्रकारत छप्पँ जुइमाः धासें सरोकारवाला निकायलिसे समन्वय यानाः न्ह्याः वनेगु ताः तयाः थुगु समाज नीस्वंगु खः। स्वनिगलय् विधिवत रुपं दर्ता जूगु थुगु समाजया कार्यसमितिइ अध्यक्ष श्रीजन झा, उपाध्यक्ष निरज रञ्जित, महासचिव भविन्द्र कार्की, सचिव अन्जना न्यौपाने, कोषाध्यक्ष सम्झना वन व दुजलय् गिरिस उपाध्याय व पद्मसागर कक्षपति च्वंगु दु ।

न्हू गठित थुगु संस्थां राष्ट्रया मुद्दाय् आवश्यक जूकथं सहलह ब्याकेगु व पत्रकारया पेशागत सुरक्षा व हकहितया ज्याझ्वः न्ह्याकेगु खँ धाःगु दु। थुकियालिसें शिक्षा, स्वास्थ्य, पर्यटन लगायतया समाजिक क्षेत्रय् नं जनजागरणया ज्याझ्वः न्ह्याकेगु ताः तयाच्वंगु दु। थःगु संस्थालिसे ज्वःलाःगु मेमेगु संस्था व सरोकार निकायलिसे जानाः छप्पँ जुयाः आज्जु पूवंकेगु ताः नं थ्वं तःगु दु ।