'संविधान दयेकेगु जिम्मेवारीपाखें बिसिउँ वने मजिउ'

येँ (सन्ध्या टाइम्स)/नेवाः जागरण मञ्चं छगू प्रेस वक्तव्य पितबिसें संविधान दयेकेगु जिम्मेवारीपाखें सुं नं बिसिउँ वनेमजिउगु खँ धाःगु दु। मञ्चया संयोजक संयोजक सुजीव बज्राचार्यं वंगु आइतवाः पितबिउगु प्रेस वक्तव्यय् धयातःगु दु, 'संविधान दयेकेगु अन्तिम ई वयेधुंकाः नं संविधान दयेकाः निगूगु जनआन्दोलनया उपलब्धिया रक्षा यासें सलंसः दँ न्ह्यःनिसें उत्पीडनय् लानाच्वंपिं जाति-जनजातितय्गु थःगु भूमिइ थःपिंसं हे शासन यायेगु व स्वायत्त राज्यया अधिकार बीगु खँय् जुयाच्वंगु अलमलयात कयाः नेवाः जागरण मञ्च गम्भीर जूगु दु। सत्ता संघर्ष, राजनीतिक खिचातानी व अनेतने पहलं जनतां लःल्हाःगु ज्यापाखें नेतात बिसिउँ वना व आरोप प्रत्यारोप यानाः थःपिं बचय् जुइत स्वयेवं आः जनता सुम्क च्वनीगु अवस्था मदु धकाः चेतावनी बियाच्वना ।'

थुकथं हे वक्तव्यय् 'पहिचान व सामर्थ्यया आधारय् स्वायत्त राज्यया व्यवस्था दुगु संविधान दयेकेगु ज्या आः थथें हे यानाः प्राविधिक रुपं माःगु ईया नितिं संविधानसभाया म्याद तनेमा, थुकी गुगु नं कथं व छुं नं नामं षडयन्त्र जुइमजिउ धकाः नं जोडदाररुपं माग यानाच्वना' धाःगु दु ।

अथेहे नेवाः जागरण मञ्चया वंगु शनिवाः च्वंगु मुँज्यां वइगु बैशाख ३१ गते यायेगु धकाः क्वःछिनातःगु न्हापांगु अधिवेशन लिछ्याःगु दु। उगु मुँज्यां देय्या वर्तमान राजनीतिक स्थितियात कयाः सहलह यासें वइगु जेठ १४ गते स्वयां न्ह्यः अधिवेशन मयायेगु निर्णय याःगु दु। जेठ १४ गते न्हूगु संविधान जारी यायेगु न्हि लिपाया राजनीतिक स्थितियात स्वयाः जक तिथि क्वःछिइगु निर्णय याःगु खः ।

अथेहे मूज्यां मञ्चया सदस्यता वितरण व्यापकरुपं न्ह्याकेगु निर्णय यासें जेठ १४ या दुने द्वःछि सदस्यता वितरण यायेगु निर्णय नं याःगु दु। मञ्चया संयोजक सुजीव बज्राचार्यया सभापतित्वय् जूगु उगु मुँज्यां न्हूगु संविधान निर्माणया ज्याय् वयाच्वंगु पंगः व राज्य पुनर्संरचनाया सम्बन्धय् कयाः वइगु बैशाख ३१ गते छगू अन्तर्क्रिया ज्याझ्वः यायेगु निर्णय याःगु दु ।

अथे हे मञ्चय् आबद्ध, क्रियाशील सदस्यपिनि दथुइ अझ अप्वः भावनात्मक व सांगठनिकरुपं सक्रियरुपं न्ह्यायेगु नितिं जेठया न्हापांगु वालय् छगू गँुभ्वय् यायेगु निर्णय नं याःगु दु ।