'मिश्रित फोर्स दयेकाः सेना समायोजन यायेगु खँय् सहमति जुइ'
एकीकृत नेकपा (माओवादी)या नेता वर्षमान पुन 'अनन्तं' सेना, सशस्त्र प्रहरी, जनपथ प्रहरी व लडाकु दुथ्याकाः मिश्रित फोर्स दयेकाः लडाकु समायोजन यायेगु विषयलय् दलत दथुइ सहमति जुइगु दावी यानादीगु दु ।
रिपोटर्स क्लबं मंगलवाः येँय् याःगु साक्षात्कार ज्याझ्वलय् नेता पुनं समायोजनया प्यंगू बिस्कं बिस्कं मोडलय् सहलह जुयाच्वंगु धयादिसें उकि मध्ये सेनाया महानिर्देशनालय अन्तर्गत मिश्रित फोर्स दयेकीगु विषयलय् दलत सहमति नापसं थ्यंगु धयादिल । जेठ १४ न्ह्यः हे मिश्रित फोर्सय् सहमति यानाः मोडालिटी व समायोजन कार्यतालिका दयेकीगु जानकारी नं वय्कलं बियादिल ।
उगु हे ज्याझ्वलय् नेपाली कांग्रेसया नेता डा. रामशरण महतं धाःसा मिश्रित फोर्स दयेकीगु खँय् कांग्रेस सहमति जुइमफइगु धयादिल । वय्कलं मिश्रित फोर्स दयेकेगु पक्षय् कांग्रेस मदुगु धयादिसें सुरक्षा निकायया मापदण्ड कथं व्यक्तिगत रुपय् समायोजन यायेमाःगु धयादिल ।
