शंकरदेव क्याम्पस क्षेत्रय् तनाव

नेपाली कांग्रेस समर्थित विद्यार्थी संगठन नेपाल विद्यार्थी संघ व प्रहरी दथुइ येँया शंकरदेव क्षेत्रय् ल्वापु जूगु दु ।

विद्यार्थीतय्सं मखूगु द्वपं बियाः वंगु आइतवाः ज्वनायंकूम्ह नेवि संघया कार्यकर्तानापं त्रिचन्द्र कलेजया विद्यार्थी वीरेन्द्र गिरीयात त्वःतेत माग यासें प्रदर्शन यायेवं निगू पक्ष दथुइ ल्वापु जूगु खः । ल्वापुया हुनिं शंकरदेव क्याम्पस, पुतलिसतक क्षेत्रय् सवारीसाधान चलेजुइफुगु मदुसाः अनया जनजीवन प्रभावित जूगु दु ।

प्रदर्शनया झ्वलय् विद्यार्थीतय्सं प्रहरीयात अप्पां कयेकूगु दुसाः प्रहरीं भीड नियन्त्रणय् कायेत आपालं राउण्ड अश्रुग्यास कयेकूगु दु । अथेहे प्रहरीं भीड नियन्त्रण यायेगु झ्वलय् शंकरदेवया स्ववियु सभापति शुभराम बस्नेत लगायत प्यम्हेसित ज्वनायंकूगु दु ।