कुटनीतिक पासपोर्ट दुरुपयोग बारे संसदीय छानबिन यायेत माग
अख्तियार दुरुपयोग अनुसन्धान आयोगं कुटनीतिक पासपोर्ट दुरुपयोग याःगु द्वपंलय् मधेशवादी नेतातय्त छानबिन याःगुयात मधेशी नेतातय्सं नियोजित षड्यन्त्रया संज्ञा बिउगु दु ।
मधेशी नेतातय्सं अख्तियारं राजनीतिक पूर्वाग्रहपाखें प्रेरित जुयाः षड्यन्त्र याःगु धासें सभामुख सुभाषचन्द्र नेम्वाङयात मंगलवाः ज्ञापनपौ लःल्हाःगु दु । सभामुख नेम्वाङयात ज्ञापनपौ लःल्हासें मधेशी जनअधिकार फोरमया सह अध्यक्ष जेपी गुप्तां थुगु विषययात संसदीय समितिं विश्वासनीय छानबिन यायेमाःगु माग यानादिल ।
सभामुखं थुगु विषलय् थः गम्भीर जूगु धयादिसें सम्बन्धीत थासय् पासपोर्ट दुरुपयोगया बारे जानकारी याकेगु धयादिल । अख्तियारं कुटनीतिक पासपोर्ट दुरुपयोग याःगु द्वपंलय् फोरमया महासचिव रामसहायक प्रसाद यादव, सल्मा खातुन, मिकरानी रम्भादेवी, शिवपूजन राय यादव, मधेशी जनअधिकार फोरम (लोकतान्त्रिक)या करिमा बेगम व सञ्जय साह विरुद्ध छानबिन न्ह्याकूगु खः ।
