सर्वोच्चं प्रधानसेनापति चीकेगुया कारण माग
सर्वोच्च अदालतं प्रधानसेनापति रुक्मांग कटवालयात बरखास्त यायेमाःगुया कारण पेस यायेत बिहिवाः सरकारया नांमय् आदेश जारी याःगु दु ।
सेनापतियात बरखास्त यायेगु सरकारी निर्णय खारेजीया माग यासें लाःगु रिटय् न्यायाधीश भरतराज उप्रेतीया एकल इजलासं उगु आदेश जारी याःगु खः । आदेशया झिंन्यान्हू दुने लिखित जवाफ पेश यायेत निर्देशन ब्यूगु दु ।
प्रधानसेनापतिया पदं कटवालयात चीकाः रथी कुलबहादुर खड्कायात कायममुकायम प्रधानसेनापतिइ नियुक्त यायेगु मन्त्रिपरिषदया निर्णय असंवैधानिक जूगु दाबी यासें निर्णय बदर यायेत अधिवक्ता दामोदर पौडेलं बुधवाः रिट दायर याःगु खः ।
आदेशय् कामु ब्यूगु ज्या असंवैधानिक व गैरकानुनी जूगु धासें कामु ब्यूगु पौ तत्काल कार्यान्वयन मयायेत, मयाकेत अन्तरिम आदेश जारी यायेत रिटय् माग यानातःगु खः ।
रिटय् प्रधानमन्त्री पुष्पकमल दाहाल प्रचण्ड, मन्त्रिपरिषदया ज्याकू व रथी खड्कायात विपक्षी देयेकातःगु दु ।
बैशाष २० गते मन्त्रिपरिषदं सेनापति कटवालयात पदं चीकाः खड्कायात कायममुकायम बीगु निर्णय याःगु खः ।
