सत्तापक्षया मेचय् प्रतिपक्षया सचेतक
येँ (सन्ध्या टाइम्स)/संसदय् सत्तापक्ष व प्रतिपक्षया सभासद्त च्वनेगु नितिं ब्यागलं ब्यागलं थाय् बियातःगु दइ। मेचय् फ्यतुनाच्वंगु आधारय् हे सत्तापक्ष व प्रतिपक्षया सभासद् धकाः म्हसीकीगु खः ।
संसदय् धाःसा सत्तापक्षया मेचय् प्रतिपक्षया संसदीय दलया प्रमुख सचेतक फ्यतुनाच्वंगु खनाः चीधंगु पार्टीया सांसद्त अजूचाःगु दु ।
म्हिगः प्रमुख प्रतिपक्षी नेपाली कांग्रेसया प्रमुख सचेतक लक्ष्मण घिमिरे सत्तापक्षया मेचय् फ्यतुनाच्वंगु खः।
संसदया बैठकया झ्वलय् मिसापिं सांसदतय्सं घेराउ यायेगु, सभामुखं न्ववायेगु नापं नेपाः राष्ट्रिय पार्टीया सभासद् बुद्ध साय्मि नापं चिचीधंगु स्वंगू पार्टी व स्वतन्त्र छम्ह नापं यानाः प्यम्ह सांसद्तय्सं रोष्टम घेराउ यानाच्वंगु इलय् हे कांग्रेसया प्रमुख सचेतक घिमिरे सत्तापक्ष च्वनीगु मेचय् वनाः फ्यतुनाच्वंगु खः ।
अथे प्रतिपक्षया प्रमुख सचेतक हे सत्तापक्षया थासय् फ्यतुनाच्वंगुलि आखिर थुपिं सत्तापक्ष व प्रतिपक्ष धाःसां दुनें दुनं मिले जुयाः पिने जक कचमच जुयाच्वंगु थें क्यनाः जनतायात अलमल यानाच्वंगु जकं मखु ला धकाः सांसदतय्सं टिप्पणी यानाहःगु दु ।
