बाखं दबूया बाखं गोष्ठी
येँ (सन्ध्या टाइम्स)/ बाखं दबूया ग्वसालय् वंगु शनिवाः कुन्हु थनया वनस्थली कलेजय् छगू बाखं गोष्ठी जुल। बाखं दबूया नायः लक्ष्मण राजवंशीया सभापतित्वय् न्ह्याःगु उगु ज्याझ्वलय् विजयरत्न असंबरे, सुजिता माःजु, तिलकप्रकाश कायस्थ, पुष्परत्न तुलाधर, मिना वज्राचार्य, सौरभ शाक्य, बद्री वेदना, श्याम आशा व तुयू पुंपिंसं थःथःगु बाखं न्यंकादीगु खः ।
ज्याझ्वलय् वाचन जूगु बाखंयात कयाः सहलह व अन्तर्त्रिया यायेगु ज्या नं जूगु खः। भगतदास श्रेष्ठ, रामशेखर नकःमि, श्रद्धा शाक्य, माणिक लाल उराय्, शशिकला मानन्धर, केदार सितु, हरिशंकर रंजितकार, मोतिलक्ष्मी शाक्य, कृष्णभक्त बोडे, पुष्पबहादुर चित्रकार, प्रा. नर्मदेश्वर प्रधान, राजा शाक्य व स्वयम् बाखं च्वमिपिंसं नं बाखं विधाया थीथी पक्षयात कयाः कुलादीगु खः ।
ज्याझ्वलय् नायः भाजु लक्ष्मण राजवंशीं प्रत्येक बाखंयात हरेकं थःथःगु मिखां स्वयाच्वनी धयादिल। वय्कलं बाखं दबुलिं नेपालभाषाया बाखं विधायात च्वन्ह्याकेत एकेडेमि व मेमेगु संस्थानाप जानाः मेमेगु भाय्या साहित्यकारपिंत नं ब्वनाः तःजिक बाखं गोष्ठी यायेगु ताः दुगु जानकारी नं बियादिल ।
