झलनाथयात कारवाही जुइ: नेपाल
येँ (सन्ध्या टाइम्स)/पुलांम्ह प्रधानमन्त्री नापं एमालेया वरिष्ठ नेता माधवकुमार नेपालं प्रधानमन्त्री एवं पार्टीया अध्यक्ष झलनाथ खनालं पार्टी निर्णयया अःखः एकीकृत माओवादीयात गृहमन्त्री बिउगुलिं वय्कःयात कारवाही यायेगु जुइ धयादीगु दु ।
पार्टीया विवाद ज्यंकेगु विषयसं ध्यानाकर्षण यायेगु निंतिं नेपालगन्जय् च्वंपिं कार्यकर्तात वयाः इनाप याःगु इलय् नेपालं थःगु हे निवासय् कार्यकर्तातलिसे खँ ल्हासें अथे धयादीगु खः ।
पार्टीया अध्यक्षं हे पार्टीया निर्णय अःखः ज्या यानाः अराजकता प्रदर्शन यात धकाः नं वय्कलं द्वपं बियादिल। पार्टीया आः जूवनाच्वंगु केन्द्रीय कमिटीया बैठकं खनालयात आत्मालोचना याकेगु बाय् अनुशासनया कारवाही यायेगु जुइ धकाः नं नेता नेपालं धयादिल।
वय्कलं वर्तमान सरकार पूर्ण रुपं असफल जुइधुंकूगु जुयाः विकल्प माले हे मालेधुंकूगु बिचाः नं प्वंकादिल ।
सूत्रतय्सं धाः कथं एमाले दुनेया ओली नेपाल पुचलं वर्तमान सरकारया औचित्य हे मदयेधुंकल धासें सरकारयात थःगु औचित्य पुष्टि यायेत हाथ्या बिउगु दु। आः प्रम टर्कीं लिहां वयाखतं हे पार्टीया केन्द्रीय कमिटीया बैठक सःतातःगु दु। उगु बैठकय् प्रमं थः राष्ट्रिय सहमति दयेकेत गुलि ताःलात धइगु बारे पार्टीयात विश्वासय् कायेत नं हाथ्या बिउगु दु ।
