दाजुकिजा ल्वापुइ तलेजुया ठेकेदार घाःपाः
ख्वप (सन्ध्या टाइम्स)/ख्वपया तलेजुइ माःकथंया पशुपंछि व आवश्यक खाद्य पदार्थ ठेक्का कायेगु ज्या यानाच्वंम्ह बद्री कर्माचार्ययात सम्पत्तिया खँय् थः हे दाजुकिजापिंसं दायाः घाःपाः याना बिउगु खँ वय्कःया केहेँ बिना कर्माचार्यं 'सन्ध्या टाइम्स'यात कनादीगु दु। घटना छवाः न्ह्यः सांगा नासिका स्थान गाविस वडा नं. ४ य् जूगु खः। घटना विवरण कथं उकुन्हु अबु तुलबहादुर कर्माचार्य व काय पुण्यलाल कर्माचार्य दथुइ ल्वापु जुल धकाः चान्हय् भौम्ह शुशिला कर्माचार्यं लिक्क च्वंगु बद्री कर्माचार्यया छेँय् सःतःवःगु जुयाच्वन ।
उगु इलय् लँय् हे पियाः किजा कृष्णगोपाल कर्माचार्ययात अबु-काय जानाः दायाच्वंगु खनेवं गनेत वंम्ह बद्री कर्माचार्ययात नं अप्पां छ्यानाः घाःपाः याना बिउगु खः। घाःपाः जूम्ह बद्रीया देपागु मिखाय् घाः लानाच्वंगु दु। वयात उघिमय् भ्वँतया शिर मेमोरियल अस्पताल यंकूगु खःसा अन वासः याके फइ मखुत धायेवं नेपाल आँखा अस्पताल तिलगंगाय् हःगु खः। अन सामान्य टांका तयाः सातिकुन्हु हे सांगा प्रहरी चौकीइ जाहेरी तयेवं पुण्यलाल कर्माचार्ययात प्यन्हु ज्वंगु दु ।
ज्वनाः सातिकुन्हु हे थः मांया श्राद्ध धकाः छेँय् लित ब्वना यंकूम्ह पुण्यलाल कर्माचार्ययात आः बनेपा प्रहरी चौकीइ तयातःगु दु। बनेपा प्रहरी चौकीया प्रहरी निरीक्षक सन्तोष तामाङं घटना बारे आवश्यक अनुसन्धान यानाः जक कारवाही यायेगु खँ धाःगु दु ।
