मिसा सभासद्तय्सं संसद मुँज्याय् अवरोध
थीथी राजनीतिक दलनाप आवद्ध मिसा सभासद्तय्सं वर्तमान मन्त्रिमण्डलय् मिसातय् ल्याः ३३ प्रतिशत मजूगु विरोधय् थौं व्यवस्थापिका संसदया मुँज्याय् अवरोध यात ।
व्यवस्थापिका संसदय् एक तिहाई दुपिं मिसात मध्ये आपालं सभसाद्तय्सं संसदया मुँज्या सुरु जुइवं रोस्टम घेराउ याःगु खः । दक्वं कथंया सरकारी निकायलय् मिसातय् ३३ प्रतिशत प्रतिनिधित्व यायेगु धकाः राजनीतिक दलतय्सं प्रतिबद्धता प्वंकूसां वर्तमान सरकारय् ३३ प्रतिशत मिसा मन्त्री नियुक्त मयागु धासें सभासद्तय्सं विरोध प्वंकूगु खः ।
मिसा सभासद्तय्सं रोस्टम घेराउ यानाः मुँज्याय् अवरोध थनेवं सभामुख सुभाषचन्द्र नेम्वाङ मिसा सभासद्तय् मुद्दाया बारे प्रधानमन्त्री नापं सम्बन्धीत निकायया ध्यानाकर्षकण यायेगु प्रतिबद्धता प्वंकादिल । उगु प्रतिबद्धता लिपा मिसा सभासदतय्सं मुँज्या सुचारु जुइ बिउगु खः ।
तर मिसा सभासद्तय् रोस्टम घेराउ ज्याझ्वः क्वचायेवं चिधंगु दलया प्यम्ह सभासद्तय्सं रोस्टम घेराउ याःगु खः । आदिवासी जनजाति, दलित व मुस्लिम समुदायया माग सम्बोधन यायेमाःगु माग यानाः सभासद्त विश्वेन्द्र पासवान, रुक्मणी चौधरी, सरदुल मियाँ हक व बुद्ध साय्मिं घेराउ याःगु खः ।
