'न्हापां सेना समायोजनया प्रक्रिया न्ह्याकि'
येँ (सन्ध्या टाइम्स)/ नेपाली कांग्रेसया सभापति सुशील कोइरालां वइगु जेष्ठ १४ गते दुने हे शान्ति प्रक्रिया पूवंकेगु खँय् फुक्कं दलत सहमत जुल धाःसा जक न्हूगु संविधानया नितिं संविधानसभाया म्याद थप यायेत थःपिं तयार जुइ फइ धयादीगु दु ।
थौं सुथय् दाङया घोराही लागाय् पत्रकार सम्मेलनय् न्ववायेगु झ्वलय् वय्कलं थ्व खँ धयादीगु खः। कांग्रेस सभापति कोइरालां आःया हे अवस्थाय् गुगुं नं हालतय् संविधानसभाया म्याद थप यायेगु पक्षय् नेपाली कांग्रेस मदु धकाः नं स्पष्ट यानादीगु खः ।
वय्कलं शान्ति व संविधानया सुनिश्चितता मजूगु अवस्थाय् संविधानसभाया म्याद थप यायेगुया छुं हे अर्थ मदु धकाः नं धयादिल ।
माओवादीं तःक्वःमछि हे झंगः लायेधुंकूगु जुयाः लडाकु समायोजनया ज्या मन्ह्याःतले म्याद थप यायेगु जुइ मखु धकाः नं कांग्रेस सभापति कोइरालां धयादीगु खः। शान्ति प्रक्रियायात वेवास्ता यानाः संविधान सभाया म्याद जक खुदँ थपे याःसां नं संविधान दयेके फइगु अवस्था मदु धकाः नं धयादिल ।
अथे हे कांग्रेस संसदीय दलया नेता रामचन्द्र पौडेलं एमाले व माओवादी दथुइ जूगु न्हय्गू बुँदाया सहमतिं दलतय्गु दथुइ असमझदारी ब्वलन धयादिल ।
वय्कलं द्वैध चरित्र व माओवादीया छलकपटया कारणं देशय् परिर्वतनयात संस्थागत यायेत थाकुयाच्वंगु खः धकाः नं धयादिल ।
