जेष्ठ १४ न्ह्यः हे मस्यौदा हयेमा: संचारमन्त्री
य ल(सन्ध्या टाइम्स)/सूचना तथा संचारमन्त्री अग्नी सापकोटां राजनीतिक दलतय्सं जेष्ठ १४ गते न्ह्यः हे संविधानया एकीकृत मस्यौदा हयेमाः धयादीगु दु। वय्कलं जनताया विश्वास कायेत शान्ति व संविधानया प्रगतिया विषयय् दलतसें स्पष्ट यायेमाः धकाः नं धयादिल। नेपाल पत्रकार महासंघया न्हू निर्वाचित जूगु कार्यसमितियात थःगु हे मन्त्रालयय् थौं सुथय् लसकुस यायेगु झ्वलय् संचारमन्त्री सापकोटां अथे धयादीगु खः ।
वय्कलं जनतायात विश्वास कयाः न्ह्याः वनेमाःगु व उकिया नितिं दलत स्पष्ट जुइमाः धयादिल। माओवादीया लडाकु समायोजनया प्रक्रिया जेष्ठ १४ न्ह्यः हे छपलाः न्ह्याः वनी धासें वय्कलं धयादिल,'राजनीतिक दलतसें थःपिनिगु कमी कमजोरीयात कयाः आत्मालोचना यानाः आःया कार्ययोजना प्रति प्रतिबद्ध जुइमाः, जनताया विश्वास त्वाःदल धाःसा मुलुक अन्धकारय् वनी।'प्रेसयात आलोचनाया अधिकार सुनिश्चित दु धयादिसें वय्कलं प्रेस स्वतन्त्रताप्रति थःपिनिगु प्रतिबद्धता दु धकाः नं धयादिल ।
