अमेरिकायात गुल्पाः दान
येँ (सन्ध्या टाइम्स)/देशविदेशय् कलात्मक गुल्पाः दाना याना वयाच्वनादीम्ह दाता जीवरत्न स्थापित (गुल्पारत्नं) अमेरिकाया पोर्टल्याण्डय् च्वंगु नृत्यमण्डल महाविहारयात नं छगः गुल्पाः दाना यानादीगु दु। अमेरिकाय् छ्वयेगु लागिं छुं न्हि न्ह्यः तिनि प्रतिनिधि कथं भाजु सर्वज्ञरत्न वज्राचार्ययात उगु गुल्पाः दान लःल्हायेगु ज्या जूगु खः। दाता स्थापितया छेँय् हे जूगु छगू ज्याझ्वःया दथुइ वय्कलं उगु गुल्पाः लःल्हानादीगु खः ।
उगु हे ज्याझ्वलय् दाता स्थापितं देय्या थीथी लागाय् दयेकातःगु प्यंगू विहारय् स्वनेगु लागिं भगवान बुद्धया मूर्ति नं लःल्हानादीगु खः। उगु ज्याझ्वलय् धादिंगया चोखो गुम्बा, रुपन्देहीया पद्मचैत्य विहार, बन्दीपुरया बौद्ध सदन शाक्यमुनि गुम्बा व रुपन्देहीया धर्मोदय सभायात बुद्ध मूर्ति दान यानादीगु खः। मूर्ति ३ फिट तःधीम्ह सेरामिकयागु खः ।
