अमेरिकाय् नेपाःया म्याराथुन

येँ (सन्ध्या टाइम्स)/थीथी ज्याझ्वःलिसें क्वचाःगु मजदूर दिवस कुन्हु अमरिकाय् नं नेपाःमितय्सं थ्व दिवस न्यायेकल। वंगु मे १ कुन्हु कोलोराडोया फार्ट कलिन्सय् जूगु कोलोराडो म्याराथुनय् स्वंगू राज्यया न्याम्ह नेपाःमितय्सं ब्वति काःगु खः। ४२ कि.मि. या उगु म्याराथुन 'न्हूगु नेपाःया निंतिं दौड' धइगु नां तयाः न्ह्याःगु खः। उगु हे म्याराथुनय् महावीर पुनया हिमाञ्चल फाउन्डेशनया निंतिं लछिया चन्दा संकलन यायेगु ज्या नं जूगु खः। म्याराथुनय् व्योमिंग राज्यं रोहित श्रेष्ठ, कोलोराडो राज्यं अनुरक्त श्रेष्ठ, नेब्रास्का राज्यं कर्मा बस्नेत, नेत्र पोखरेल व सुनिल ढुंगानां ब्वति काःगु खः। करिब खुलाया कुतः लिपा जूगु ४२ कि.मि. या उगु म्याराथुन सफलतापूर्वक क्वचाःगुलिं ब्वति काःपिंसं लसता प्वंकूगु दु। महावीर श्रेष्ठं नेपाःया विकासयात ध्यानय् तयाः याःगु ज्याय् ग्वाहालि यायेखंगुलिं थःपिं अतिकं लय्ताःगु खँ कँसें नेपाःया विकासया ताः तया भविष्यय् नं थज्याःगु ज्या यायेगु धाःगु दु। म्याराथुनय् ७५,३०५,५९ तका चन्दा नं मुंगु खः ।