माओवादी थःगु हे नीति व शैलीं समाप्त जुइ : कोइराला
नेपाली कांग्रेसया सभापति सुशील कोइरालां माओवादी थःगु हे नीति व शैलीया हुनिं समाप्त जुइगु खँ धयादीगु दु । माओवादीं अझ् नं हतियार मोह मत्वःतुगु द्वपं बियादिसें वय्कलं साम्यवादी बिचाः व ल्वाभः मत्वःतुसाः माओवादी समाप्त जुइगु ख्याच्वः बियादिल ।
कांग्रेसया राष्ट्रिय जागरण अभियान अन्तर्गत थौं दाङय् याःगु आमसभायात सम्बोधन यानादिसें सभापति कोइरालां शान्ति प्रक्रिया क्वमचायेकं संविधान जारी यायेमज्यूगु खँय् बः बियादिल । वय्कलं छगू दलनाप ल्वाभः तयाः संविधान जारी याःसा उकिं जनताया अधिकार सुनिश्चित मयाइगु दावी यानादिल ।
आमसभाय् कांग्रेस वरिष्ठ नेता शेरबहादुर देउवां माओवादीं शान्ति व संविधान निर्माणय् च्यूताः मतःगुलिं आ: उकियात तार्किक निष्कर्षय् थ्यंकेत कांग्रेसं नेतृत्व याइगु धयादिल ।
कांग्रेस उपसभापति रामचन्द्र पौडेलं माओवादी व एमालेया हुनिं शान्ति व संविधान निर्माणया ज्या न्ह्याः वनेमफुगु द्वपं बियादिल । आसभायात कांग्रेस नेतात प्रकाशमान सिंह, कृष्ण सिटौला, गोपलमान श्रेष्ठ, विमलेन्द्र निधि, खुमबहादुर खड्का लगायत निगू दर्जन नेतातय्सं सम्बोधन यानादीगु खः ।
