'खनालं पार्टी निर्णयया गम्भीर अवज्ञा'
प्रधानमन्त्री नापं जुयादीम्ह नेकपा (एमाले)या नायः झलनाथ खनालं गृह मन्त्रालय माओवादीयात बियाः पार्टी निर्णयया गम्भीर अवज्ञा याःगु खँ उगु हे पार्टीया न्वकु विद्या भण्डारीं धयादीगु दु ।
एमाले निर्वाचन क्षेत्रीय कमिटी ४ येँया न्हापांगु अधिवेशनया शनिवाः येँय् उलेज्या यानादिसें वय्कलं प्रधानमन्त्रीं खनालं थःयथे निर्णय यानाः पार्टी निर्णय अःख वंगु द्वपं बियादिल । वय्कलं पार्टीया विश्वास कयाः न्ह्याः वनेमाःगु थाय् प्रधानमन्त्री खनाल झन् पार्टीया हे निर्णय अःख वंगु धासें आपत्ति प्वंकादिल ।
वय्कलं आः च्वनीगु केन्द्रीय कमिटीया मुँज्यां प्रधानमन्त्री खनालयात उगु निर्णय लितकायेत इनाप याइगु धयादिल । म्हिग च्वंगु एमाले पोलिटब्यूरो मुँज्याय् आपालं नेतातय्सं खनालया निर्णयया विरोध यायेवं उगु विषयलय् गम्भीर सहलह यायेत वइगु जेठ ८ गते निसें पार्टीया केन्द्रिय मुँज्या आह्वान या:गु ख: ।
