एमाले नेताया दवाबय् चर्चित डन त्वःतल
प्रमुख सत्तारुढ दल नेकपा (एमाले)या नेतातय्गु दवाबय् येँया अपराधिक पुचःया नाइके 'चरी' धइम्ह दिनेश अधिकारीयात त्वःतूगु दु । एमाले धादिङ क्षेत्र नम्वर एकया न्वकु नापं जुयाच्वंम्ह वयात एमालेया शीर्ष नेतापिनिगु दवाबय् त्वःतूगु प्रहरी श्रोतं जानकारी ब्यूगु दु ।
श्रोतयाकथं थीथी अपराधिक क्रियाकलापय् ल्हाः दुम्ह अधिकारीयात त्वःतूसां नं वलिसे छगू हे द्वपनय् ज्वंपिं मेमेपिं मनूतय्त धाःसा त्वःतूगु मदुनि । छम्ह प्रहरी अधिकृतं सत्तारुढ दलपाखें हे त्वःतेत दवाब बिइवं त्वःतेत बाध्य जूगु जानकारी ब्यूगु दु । चरीयात निदँ न्ह्यः निरञ्जन सिलवालयात गोलीं कयेकूगु द्वपं लाःगु ख । येँया सोर्हखुट्टे, सामाखुशी, न्हू बजाः क्षेत्रय् अपराधिक क्रियाकलापय् ल्हाः दुगु द्वपं लाःम्ह वयात धादिङपाखें टेन्डर कमिसन म्हयाः येँ लिहांवयेगु झ्वलय् प्रहरीं निवाः न्ह्यः नागढुंगापाखें ज्वंगु खः ।
येँय् थौं ग्वसाः ग्वःगु पत्रकार सम्मेलनय् येँया प्रहरी प्रमुख केदार रिजालं धाःसा अधिकारी अपराधिक क्रियाकलापय् ल्हाःदुगु पुष्टि मजूगुलिं त्वःतूगु दाबी यानादीगु खः । येँया प्रहरीं म्हिगः सनिलय् जिल्ला प्रशासन ज्याकुथिइ छ्वयेवं हे अधिकारीयात त्वःतूगु खः ।
