मन्त्रीतय् नां ल्ययेगु बारे पार्टी दुने पर्याप्त सहलह मजू : वैद्य
एकीकृत नेकपा (माओवादी)या वरिष्ठ न्वकु मोहन वैद्य
'किरणं' लिपांगु खुसिइ जूगु मन्त्रिपरिषद् विस्तारय् पार्टी दुने पर्याप्त सहलह मजूगु खँ धयादीगु दु ।
येँया जनसञ्चार अभियानय् थौं शोभा कट्टेलपाखें च्वयादीगु 'समरका स्मृतिहरु' नांया कृति उलेज्यालिपा सञ्चारकःमिपिंलिसे खँल्हानादिसें किरणं मन्त्रीया नांधलः छ्वयेगु लिपांगु इलय् नायः पुष्पकमल दाहाल 'प्रचण्डं' पार्टीदुने सहलह मयाःगु दाबी यानादिल ।
थःम्हं मिसा प्रतिनिधित्व व समावेशीताय् ब: बियागु धयादिसें वय्कलं सरकारय् फुक्क पक्षया सम्मानजनक ब्वति मदुगु न्ह्यथनादिल । पार्टीदुने दुगु क्षमतायात म्हसीके मफुगु धयादिसें किरणं मन्त्री ल्ययेगुलिइ खनेदुगु कचवं याकनं हे ज्यनीगु विश्वास नापं प्वंकादीगु दु । मन्त्री ल्ययेगु विषयसं खनेदुगु कचवं सु नं मनूप्रति केन्द्रित मदुगु धयादिसें वय्कलं ल्यं दनीपिं मन्त्रीतय्सं याकनं हे सपथ काइगु नापं जानकारी बियादिल।
थ्व स्वयाः न्ह्यः केन्द्रीय समिति व पदाधिकारी बैठकं पार्टीपाखें सरकारय् वनीपिं मन्त्रीतय्गु नांधलः ल्ययेत लिपांगु भालाः ब्यूकथं नायः प्रचण्डं मन्त्री जूपिनिगु नांधलः प्रधानमन्त्रीयात लःल्हाःगु खः । तर किरण पक्षधरं थःपिनिगु सम्मानजनक प्रतिनिधित्व मजूगु जानकारी बियाः मन्त्री ल्यःगुप्रति च्यूताः प्वंकादीगु खः ।
