जिल्ला अदालतपाखें त्वःतुपिं सभासदत हाकनं ज्वन

कुटनीतिक राहदानी दुरुपयोग याःगु द्वपनय् सभासद्पिं वीपी यादव व गायत्री शाहयात अख्तियार दुरुपयोग अनुसन्धान आयोगं ज्वंगु दु । येँ जिल्ला अदालतं झिद्वः/झिद्वः तका धरौटीइ त्वःतूसां नं उमित अख्तियारं हाकनं ज्वंगु खः । सभासद्पिंत अख्तियारया हिरासतय् तयातःगु दु ।

थ्व स्वयाः न्ह्यः जिल्ला अदालत येँया न्यायाधीश लेखनाथ घिमिरेया याकः इजलाशं सभासद्पिं शाह व यादवयात मुद्दाया पुर्पक्ष यायेगुकथं तारेखय् त्वःतेत उजं ब्यूगु खः । सभासद्पिं शाह व यादवविरुद्ध कुटनैतिक राहदानी दुरुपयोग याःगुलिं राहदानी ऐनकथं कसुर याःगु द्वपनय् जिल्ला अदालत येँय् मुद्दा न्ह्याकूगु खः । कुटनीतिक राहदानी दुरुपयोग याःगु द्वपनय् प्रहरीं बैशाख ६ गते उमित संविधानसभा भवनपाखें पिहाँ वयाच्वंगु इलय् ज्वंगु खः ।