३० गतेया बन्द लिपा निरन्तर प्रदर्शन
यल (सन्ध्या टाइम्स)/आदिवासी जनजातितय्सं थ्वहे वइगु बैशाख ३० गतेया नेपाल बन्द लिपा नं निरन्तर प्रदर्शन धाःसा जारी हे यानाच्वनेगु खँ धाःगु दु ।
नेवाः-ताम्सालीङ संयुक्त संघर्ष समितिया ग्वसालय् थौं सुथय् यलया अक्षेश्वर महाविहारय् जूगु आदिवासी जनजातिया थीथी संघ संस्था नापं संघर्ष समितिया छगू भेलां थ्व निर्णय याःगु खः ।
उगु भेलां आदिवासी जनजातितय्गु मंकाः आन्दोलन न्ह्यब्वाकेत नेवाः स्वायत्त राज्य मंकाः संघर्ष समिति, ताम्सालिङ संयुक्त संघर्ष समिति, नेपाल आदिवासी जनजाति महासंघ नापं थीथी राजनीतिक दलया जातीय खलः पुचः नापं थीथी संघर्ष समितिपाखें छम्ह/छम्ह यानाः च्याम्हेसिया समन्वय समिति तकं दयेकूगु दु ।
उगु समन्वय समितिया बैठक वइगु बैशाख २७ गते च्वनाः बन्द ज्याझ्वः ताःलाकेगु नाप नापं संविधानसभायात निरन्तर रुपं घेराउ यायेगु लिसें येँय् बृहत् प्रदर्शन यायेगु संघर्षया ज्याझ्वः तकं तयार यायेगु निर्णय याःगु दु ।
थ्यंमथ्यं सछिम्ह आदिवासी जनजातिया न्ह्यलुवातय्सं ब्वति काःगु उगु भेलां आदिवासी जनजातितय्सं थौंकन्हय् ब्यागलं ब्यागलं कथं न्ह्याकाच्वंगु आन्दोलनयात नं एकीकृत यानाः न्ह्याका वनेगु निर्णय याःगु दु ।
