सुनसरीइ कांग्रेसया अनिश्चितकालिन बन्द
येँ (सन्ध्या टाइम्स)/नेपाली कांग्रेसं अनिश्चितकालिन बन्द आह्वान याःगुलिं सुनसरीया जनजीवन बांमलाक प्रभावित जूगु दु ।
स्थानीय खुसिइ काइगु करया बारे मोरङया बलिया धइगु थासय् वंगु सोमवाः जूगु ल्वापुइ प्रहरीया नं ल्हाः दु धइगु द्वपं बिसें कांग्रेस सुनसरीं म्हिगःनिसें अनिश्चिकालिन बन्द आह्वान याःगु खः। कांग्रेसं उगु घटनाय् संलग्न धयातःम्ह इलाका प्रहरी कार्यालय इटहरीया निरीक्षक श्यामल सुब्बायात कारवाही यायेमाःगु माग यासें बन्द आह्वान याःगु खः ।
बन्दं यानाः सुनसरीइ ताः हाकः व चीहाकः रुटय् चले जुइगु फुक्क कथंया यातायात सेवा थौं सुथंनिसें ठप्प जुयाच्वंगु दु। थुकिं यानाः उखेथुखे जुइमाःपिं मनूत प्रभावित जुयाच्वंगु दु। अथे हे अनया पसः, बजाः, शिक्षण संस्था व कलकारखाना तकं ठप्प जूगु दु ।
थ्वहे दथुइ बन्दया अवज्ञा यासें चले यानाहःगु छगः मालवाहक ट्रकयात बन्दकर्तातय्सं तोडफोड याना बिउगु दु। स्थानीय बरगाछि लागाय् थौं सुथय् उगु ट्रक ताडफोड याःगु खः ।
