सरकारं आयल निगमयात निगू अर्ब अनुदान बीगु

पेट्रोलियम पदार्थया आपूर्ति सजह यायेत सरकारं नेपाल आयल निगमयात निगू अर्ब अनुदान बीगु जूगु दु ।

बालुवाटारस्थित प्रधानमन्त्री निवासय् शुक्रवाः सुथय् च्वंगु मन्त्रिपरिषदया मुँज्यां सरकार जमानी च्वनाः कर्मचारी सञ्चयकोषपाखें निगू अर्ब त्यासाः उपलब्ध याकेगु निर्णय याःगु खः । सरकारं आयल निगमपाखें पेट्रोलियम पदार्थया आपूर्तियात सुचारु तयातयेगु निंतिं उगु अनुदान बीगु निर्णय याःगु खँ धा:गु दु ।

अथेहे मन्त्रिपरिषदं विद्युत प्राधिकरणय् राजनीतिक नियुक्ति मयायेगु निर्णय याःगु दु । सरकारं प्राधिकरणया कार्यकारी निर्देशकया नियुक्ति प्रतिस्प्रधाया आधारय् यानाः प्राधिकरणया ज्याय् सुधाय् यायेगु निर्णय याःगु खः ।

शुक्रवाः निसें जुइत्यंगु प्रधानमन्त्री झलनाथ खनालया टर्की भ्रमण नं मन्त्रिपरिषदं स्वीकृत याःगु दु ।