प्रधानन्यायाधीश रेग्मीपाखें सपथ ग्रहण
प्रधानन्यायाधीश खिलराज रेग्मीं थौं सपथ ग्रहण यानादीगु दु । थौं सुथय् राष्ट्रपति भवन शितलनिवासय् राष्ट्रपति डा. रामवरण यादवं वय्क:यात पद तथा गोपनियताया सपथ ग्रहण याकादीगु ख: ।
सपथ ग्रहण यायेवं वय्क: सर्वोच्च अदालत थ्यंका: पदभार ग्रहण यानादिल । पदभार ग्रहणलिपा प्रधानन्यायाधीश रेग्मीं भ्रष्टाचार विरुद्धया अभियानयात थ:गु कार्यकालय् नं निरन्तरता बीगु प्रतिवद्धता प्वंकादिल ।
प्रधानन्यायाधीश रेग्मीं म्हिगः राष्ट्रपति यादवं प्रधानन्यायाधीशय् नियुक्त यानादीगु खः । प्रधान न्यायाधीश रामप्रसाद श्रेष्ठं उमेर हदया कारण म्हिगः अवकास दयेधुंकाः रेग्मीयात प्रधानन्यायाधीशय् नियुक्त याःगु खः ।
२००६ साल जेठ १८ गते पाल्पाय् जन्म जुयादीम्ह रेग्मी २०२८ सालनिसें न्यायसेवाया अधिकृतपाखें सेवाय् दुहां झायादीगु खः । वय्कःयात वंगु चैत २८ गते संवैधानिक परिषद् प्रधानन्यायाधीशय् सिफारिस यायेधुंकाः संसदीय सुनुवाई विशेष समितिं रेग्मीया नां सर्बसम्मत अनुमोदन याःगु खः ।
