मन्त्री हिलेवं मन्त्रालय अलमल
येँ (सन्ध्या टाइम्स)/सञ्चारमन्त्रीं छथुं गृहमन्त्री जूवंम्ह भाजु कृष्णबहादुर महरां छगू मिटिङ्गया लागिं सःतातःपिं छपुचः संचार व्यवसायीत म्हिगः मन्त्रालय थ्यंबलय् अजूचायेमाल। वय्कःपिं मन्त्री महरालिसे लोककल्याणकारी विज्ञापन एफएमतय्त नं बीमाल धकाः वार्ता यायेत वंगु खः। तर मन्त्रालयय् थ्यंबलय् ला सञ्चारमन्त्री महरायात बिदाई यायेगु समारोह धकाः जुयाच्वंगु लानाच्वन। छाय् धकाः न्यंबलय् वय्कः थनिंनिसें थ्व मन्त्रालयय् वइ मखुत, अय् जुयाः बिदाई यानाच्वनागु धकाः कन। च्वय्या तहया कर्मचारीतय्सं थ्व जानकारी बिउबलय् क्वय्या कर्मचारीतय्सं तकं बांलाक मसिउनि ।
विदाई लिपा कर्मचारीतय् दथुइ हानं मेगु रोचक ज्या जुल। न्हूम्ह सञ्चारमन्त्री कथं अग्नि सापकोटा वइगु जुल धकाः सीदत, शपथ ग्रहण यानाः न्हूम्ह मन्त्री मन्त्रालयय् वयेसातकि वय्कःयात छगू फाइलय् सही याकेमाः धकाः कर्मचारीतय्सं छगू फाइल स्वाट्ट लिकात। तर व ला भारतीय राजदूतावासं छ्वयाहःगु फाइल लानाच्वन। सम्भवतं युटिएलयात कर मिनाहा यायेगु सम्बन्धी जुइमाः। नकतिनि वःम्ह मन्त्रीयात अज्याःगु फाइलय् सही याके जी मखु धकाः कर्मचारीत हानं मेगु फाइल मालेगु ज्याय् ब्वाँय् जुल ।
महरायात गृह सहित उप-प्रधानमन्त्री दयेकेगु निर्णय पार्टी अध्यक्ष प्रचण्डं म्हिगः सुथय् तिनि काःगु खँ सीदुगु दु। पार्टीं मन्त्रीत ल्ययेगु जिम्मा अध्यक्षयात बियातःगु खः। मन्त्री महरा शुरुंनिसें हे न्ह्याबलें अध्यक्ष प्रचण्डया पक्ष कायेगु याना वयाच्वंम्ह खः ।
