'जेठ १४ लिपा थरुहटं बिस्कं राज्य संचालन याइ'
वइगु जेठ १४ गते संविधान निर्माण मजूसाः थरुहट प्रदेशय् बिस्कं राज्य संचालन यायेगु ख्याच्वः थरुहट स्वायत्त राज्य परिषदं बिउगु दु ।
लक्ष्मण थारुं नेतृत्व याःगु परिषदं थौं येँय् पत्रकार सम्मेलन यानाः जेठ १४य् संविधान जारी यायेमाःगु व हानं संविधानसभाया म्याद थप याःसा थःपिंत स्वीकार्य मजुइगु ख्याच्वः बिउगु दु । जेठ १४य् हे संविधान जारी यायेगु निंतिं दबाव बीत थीथी संघर्षया ज्याझ्वः घोषणा यासें परिषद्या अध्यक्ष थारुं जेठ १४ लिपा थरुहट प्रदेशं बिस्कं राज्य संचालन याइगु धयादिल ।
परिषदं घोषणा याःगु संघर्षया ज्याझ्वः कथं बौशाख २७ गते प्रचार प्रसार व वालपेन्टिङ, २८ गते मसाल जुलुस व २९ व ३० गते थरुहट बन्द याइगु ज्याझ्व: दु । अथेहे जेठ ५ निसें १४ तक कैलाली, कञ्चनपुर, बर्दिया, बाँके, दाङ्ग, नवलपरासी, सिराहा, सप्तरी, उदयपुर, सुनसरी व चितवनाय् थरुहट सेनायात तालिम बिइगु नापं मिसा, विद्यार्थी, किसान, व्यापारी व कर्मचारीतय् भेला यायेगु ज्याझ्वः दु ।
अथेहे पत्रकार सम्मेलनय् थारुं माओवादी, एमाले व मधेशी जनअधिकार फारेम दथुइ जूगु सहमतियात राष्ट्रघातीया संज्ञा बियादिसें उगु सम्झौता खारेजीया माग नं यानादिल ।
