पत्रकार महासंघया अध्यक्षय् शिव गाउँले
पत्रकार महासंघया अध्यक्षय् शिव गाउँले निर्वाचित जुयादीगु दु । महासंघया येँय् जूगु २३क्वःगु महाधिवेशनय् प्रेस चौतारी व क्रान्तिकारी पत्रकार संघया मंकाः उम्मेदवार गाउँले ६८५ मत हयाः निर्वाचित जुयादीगु खः । अध्यक्षय् निर्वाचित जुयादीम्ह गाउँले महासंघया न्हापांम्ह वामपन्थी अध्यक्ष खः । वय्कःया प्रतिद्वन्दी पोषण केसीं ४४४ व केदार कोइरालां १२२ मत हःगु खः । केसी प्रेस युनियनया उम्मेदवार खःसा कोइराला स्वतन्त्र उम्मेदवार खः ।
३१ दुजः दुगु कार्यसमितिया निंतिं जूगु निर्वाचनय् प्रजातान्त्रिक प्यानलं छम्ह सचिव व न्याम्ह दुजः जक निर्वाचित जूगु दुसाः ल्यँदुपिं दक्वं चौतारी व क्रान्तिकारीया मंकाः प्रगतिशिल उम्मेदवारत निर्वाचित जूगु दु ।
उपाध्यक्षय् प्रगतिशिलपाखेंया उम्मेदवार यसोदा तिम्लिसिना निर्वाचित जुयादीगु खः । वय्कलं ६६७ मत हयाः रमेश विष्टयात परिजात यानादीगु खः । विष्टं ५४६ मत जक हःगु खः । अथेहे महासचिवलय् नं प्रगतिशिलयाया ओम शर्मा निर्वाचित जुयादीगु खः । वय्कलं ६०५ मत हःगु खःसा वय्कःया प्रतिद्वन्दी रामजी दाहालं ६०२ मत हःगु खः ।
सचिवय् जगत नेपाल निर्वाचित जुयादीगु दु । प्रेस युनियनया उम्मेदवार नेपालं ६३५ मत हःगु खःसा प्रगतिशिलया उम्मेदवारया चन्द्रमान श्रेष्ठं ५१३ मत हःगु खः । अथेहे कोषाध्यक्षय् शितल शाहं ४९८ मत हयाः निर्वाचित जुयादीगु दु । वय्कःया प्रतिद्वन्दी बृकुमार यादवं ४१४ मत हःगु खः ।
