शिकागोय् 'नेवाः अमेरिकन दबू' स्वन

येँ (सन्ध्या टाइम्स)/नेपालभाषा, नेवाः तजिलजि व नेवाः लिपि थपू याना यंकेगु ताः तयाः अमेरिकाया शिकागोय् च्वंपिं नेवाःतय्सं 'नेवाः अमेरिकन दबू' नांगु न्हूगु संस्था नीस्वंगु दु। डा. मनोरंजन धौभडेलया अध्यक्षताय् नीस्वंगु उगु संस्थाया लिउ नायः पदय् श्रवण श्रेष्ठ व डा. जुनु श्रेष्ठ च्वनादीगु दुसा छ्यांज्ये केशरमान ताम्राकार व दांभरि किरण व्यंजनकार च्वनादीगु दु। दुजलय् प्रवन रंजित, सुशील जोशी, सुषमा श्रेष्ठ व सुनिता अमात्य च्वनादीगु। संस्थां याकनं हे नेवाः फिल्म क्यनेगु, नेवाः भाय् स्यनेगु लगायत थीथी नेवाः ज्याझ्वःत न्ह्याका वनेगु निर्णय नं याःगु दु। थुगु हे पुचलं शिकागोय् थुगुसी न्हापांखुसी न्हूदँ ११३१ हनेगु ज्या याःगु खः ।