यलय् बौद्ध संगीत जागरण
यल (सन्ध्या टाइम्स)/२५५५ क्वःगु बुद्ध जयन्तीया लसताय् प्यक्वःगु बौद्ध संगीत जागरण कार्यक्रम २०६८ रंग मिसा पुचः ज्ञानमाला भजन खलःया अध्यक्ष सानुकेशरी ताम्राकारया सभापतित्वय् जुल ।
ज्याझ्वलय् मूपाहां भिक्षु भद्दिय महास्थवीरलिसें पाहांपिं चक्रेश्वर आजु, सभासद् रामकृष्ण चित्रकार, जया ताम्राकार, तिर्थ बज्राचार्य, सुवर्ण शाक्य, बाबुराजा बज्राचार्यपिं नं उपस्थित जुयादीगु खः ।
बौद्ध संगीत जागरण समितिया सचिव इन्द्रमुनि शाक्यं ज्याझ्वःया उद्देश्य बारे कनादीगु खःसा टंगः ज्ञानमाला भजन मिसा पुचलं लसकुस म्येँ न्ह्यब्वःगु खः। ज्याझ्वलय् स्वनिगःया पीनिगू भजन खलकं म्येँ न्ह्यब्वःगु खः ।
संस्कृतिविद् सत्यमोहन जोशी, संगीतकार प्रविण मोहनप्रसाद जोशी, संगीत साधक धनबहादुर गोपाली व संगीत साधिका इन्दिरा श्रेष्ठपिं निर्णायक जुयादीगु उगु ज्याझ्वलय् संगीत जागरण ज्याझ्वःया उत्कृष्ट संगीत नगां ज्ञानमाला भजन खलः, उत्कृष्ट समूह गायनय् सुभाषित ज्ञानमाला संघ गणमहाविहार गणबहाः, व उत्कृष्ट रचनाय् ज्योतिष शाक्य कालिङ्गपोङ्ग मच्छेनारायण भजन मण्डल मच्छेगांयात बिउगु खः ।
मूपाहांपाखें हनापौ, धर्म उपहार व निर्णायक मण्डलयात मतिनाया चिं नं लःल्हाःगु खः। लिसें न्याक्वःगु बौद्ध संगीत जागरण ज्याझ्वःया पाःब्व अध्यक्ष सानुकेशरी ताम्राकारं ज्योति विहार चापागाउँयात लःल्हानादीगु खः। ज्याझ्वः बौद्ध जागरण समितिया ग्वसाः व टंगः ज्ञानमाला भजन मिसा पुचःया व्यवस्थापनय् जूगु खः ।
बौद्ध संगीत जागरण समितिया नामय् श्रद्धां मुंगु १,४०,००० तका व आः ३९,३८० तका यानाः १,७९,३८० या अक्षय कोष नं खडा याइगु जूगु दु ।
