शान्ति मन्त्री अनन्तं राजीनामा
एनेकपा (माओवादीं) वर्तमान सरकारय् थःगु पार्टीपाखें थप मन्त्रीतय् नां छ्वयेवं शान्ति मन्त्री वर्षमान पुन 'अनन्तं' थःगु पदपाखें राजीनामा बियादीगु दु ।
अनन्तं थःत गृह मबिउसाः राजीनामा बीगु ख्याच्वः न्हापा निसें बियाच्वंगुलिं वय्कलं राजीनामा बिउगु खँ धाःगु दु । माओवादीं गृह मन्त्रालयय् कृष्णबहादुर महरायात छ्वगुलिं अनन्त असन्तुष्ट जुयाः थुगु राजीनामा बिउगु धाःगु दु । तर, माओवादीं धाःसा अनन्तयात छुं ईया निंतिं जक सरकारय् छ्वःगु व आः पार्टीया ज्याय् सक्रिय यायेत लितसःतुगु दावी याःगु दु ।
माओवादी दुने गृह मन्त्रालयय् सुयात छ्वयेगु धइगु बारे न्हापां निसें विवाद जुयाच्वंगु खः । नायः पुष्पकमल दाहाल 'प्रचण्डं' गृहय् अनन्तया नां प्रस्ताव याःगु खःसा न्वकु मोहन वैद्यं देव गुरुङयात छ्वयेमाःगु अडान कयाच्वंगु खः । निगूलिं पक्षया नांमय् सहमति मजुइवं नायः प्रचण्डं गृहय् महराया नां सिफारिस याःगु खः ।
