सर्वोच्चया निर्णय लिपा क्यान्सर अस्पताल सुचारु
सर्वोच्च अदालतं भरतपुरस्थित वीपी कोइराला क्यान्सर अस्पताल नीप्यघौया दुने चायेकेत बिउगु आदेश लिपा थौं अनया कर्मचारीतय्सं अस्पताल सुचारु याःगु दु । कार्यकारी निर्देशक नियुक्ति विवादया हुनिं वंगु खुन्हु न्ह्यः निसें बन्द जुयाच्वंगु खः ।
मंगलवाः सर्वोच्च अदालतं अस्पतालय् यानातःगु तालाबन्दी नीप्यघौ दुने चायेकेत अन्तरिम आदेश जारी याःगु खः । उपभोक्ता हित संरक्षण मञ्चं सोमवाः दायर याःगु रिटय् न्यायाधीश वैद्यनाथ उपाध्यया एकल इजलासं अत्यावश्यक सेवाया धलखय् लाःगु अस्पतालयात छुं नं हालतं बन्द मयायेत आदेश बिउगु खः ।
मंगलवाः हे स्वास्थ्य मन्त्रालयया प्रतिनिधि, प्रमुख स्वंगू दलया स्थानीय प्रतिनिधि व चिकित्सकत दथुइ जूगु वार्ताय् नं बुधवाः निसें अस्पताल सुचारु यायेगु सहमति जूगु खः । उगु वार्ताय् कार्यकारी निर्देशक ल्ययेगु जिम्मा स्वास्थ्य मन्त्रालययात बिउगु खः ।
