बिन लादेन सीगु खँय् हे शंका !
येँ (सन्ध्या टाइम्स)/अमेरिकी सेनां स्याना बिउम्ह ओसामा बिन लादेनया सीम्ह सार्वजनिक यायेगु धकाः घोषणा यानाः नं अन्तिम इलय् वयाः लाश मक्यंगु कारणं यानाः लादेन सित धइगु खँय् हे शंका ब्वलंका हःगु दु। म्हिगः लादेनया सीम्ह धकाः वेबसाइटतय्सं पित हःगु छपाः किपा नं नकली धइगु खँ पिहां वयेवं फुक्कं वेबसाइटतय्सं उकियात लिकायेगु शुरु याना हःगु दु। उगु फोटो वेबसाइटय् वःगु खःसां उकियात सुनां गबलय् जारी यात धइगु खँ सीमदुगुलिं उकिया आधिकारिकताय् न्ह्यसः पिहां वःगु खः ।
लादेनया मृत्यु बारे आः तक अमेरिकी राष्ट्रपति बाराक ओबामाया भाषण छगू बाहेक छुं फोटो छपाः तकं पिहां मवःगु कारणं लादेन सीगु हे मदुनि धाइपिं मनूत नं ग्वाःग्वाः हे पिहां वःगु दु ।
आः तक लादेनया अल कायदा संगठनं थुकिया बारे छुं न्ववाःगु मदुनिसा घटनाया प्रतिरोधय् गनं छुं आक्रमण नं याःगु मदुनि। अमेरिकां धाःसा आः अल कायदापाखें जुइफुगु आक्रमणयात ध्यानय् तयाः मुक्कं देय्या सुरक्षा संयन्त्र क्वातुकेधुंकूगु दु ।
लादेन सित धकाः अमेरिकाय् मनूतय्सं लसता प्वंकूगु दुसा पाकिस्तानय् धाःसा सलंसः मनूतय्सं जुलुस पिकयाः अमेरिकाया ध्वाँय् च्याकेगु शुरु याःगु दु। अमरिकां पाकिस्तानया अब्बोतावाद धाःगु गुगु थासय् आक्रमण याःगु खः । अन बिन लादेन च्वनाच्वन धाःगु खँ न्यनाः स्थानीय मनूत तकं अजू चायाच्वंगु दु ।
