खुला जक म्याद थपे याइगु
येँ (सन्ध्या टाइम्स)/जेठ १४ गते न्हूगु संविधान मवइगु हे जुसेंलि संविधानसभाया म्याद मेगु खुला थपे यायेगु लागिं पहल शुरु जूगु दु। संविधान च्वयेगु लागिं आः ल्यं दनिगु ज्या खुलाया दुने सिधयेकेगु ताः तयाः थुपालय् खुला जक संविधानसभाया म्याद थपे यायेगु सहमति जूगु खँ सूत्रं धाःगु दु ।
संविधानसभाया म्याद खुला जक थपे यायेत एमालेया खनाल पक्ष व माओवादी तयार हे जुइधुंकूगु दु। एमाले दुने ओली पुचः म्याद थपे यायेगु पक्षय् मदुसा कांग्रेसं आः तक थुकिया बारे न्ववाःगु मदुनि। आः एमाले व माओवादीं कांग्रेसलिसे नं वाता यानाः खुला थपे यायेगु सहमति कायेत्यंगु खँ धाःगु दु ।
