वाईएमबीएयात थाइल्याण्डया अवार्ड
येँ (सन्ध्या टाइम्स)/वंगु ४० दँ न्ह्यवंनिसें बुद्ध धर्म प्रचार प्रसार याना वयाच्वंगु युवक बौद्ध मण्डल, नेपालयात थाइलैण्ड सरकारं 'बुद्धगुनुपकण अवार्ड' लःल्हाःगु दु। वंगु ४० दँ न्ह्यः ल्याय्म्हतय्त बुद्ध शिक्षा बियाः शान्ति व सम्मुनत समाज निर्माण यायेगु ताः तयाः थुगु संस्था नीस्वंगु खः ।
लिसें वंगु झिदँ न्ह्यवंनिसें बुद्ध धर्म उत्थान याना वयाच्वंगु युवक बौद्ध मण्डल, नेपालपाखें थाइलैण्डय् मू ज्याकू दुगु विश्व बौद्ध भातृत्व युवा संघ (डब्लुएफबीवाई) का उपाध्यक्ष सुरज शाक्ययात नं उगु हे इलय् 'बुद्धगुनुपकण अवार्ड' लःल्हाःगु खः। थ्व बाहेक मलेसिया, बंगलादेश, ताइवान, थाइलैण्डया बुद्ध धर्म उत्थानय् सक्रिय जुयाच्वंपिं थीथी महानुभावतय्त नं अवार्ड लःल्हाःगु खः।
उगु अवार्ड थाइलैण्डस्थित महाचुलांकर युनिभर्सिटीइ वंगु बैशाख १० गते छगू ज्याझ्वःया दथुइ श्रद्धेय संघराजापाखें लःल्हाःगु खःसा अवार्ड युवक बौद्ध मण्डल, नेपालपाखें अध्यक्ष हेरारत्न शाक्यं लःल्हानादीगु खः। थ्व अवार्ड नेपाःयात लःल्हाःगु थ्वहे न्हापांखुसी खः ।
बुद्ध मूर्ति उलेज्या
छत्रपुर बुद्ध विहारय् ज्याथम्ह भिक्षु अश्वघोष महास्थवीरं न्यागू फिटया बुद्ध मूर्तिया उलेज्या यानाबिज्यात। ज्याझ्वलय् मूर्तिदाता मोतिलाल शिल्पकारं बौद्ध सिद्धान्त बारे बिचाः प्वंकादीगु खः। भाजु पूर्णमानया सभापतित्वय् न्ह्याःगु उगु ज्याझ्वलय् भिक्षु कौण्डन्य, भिक्षु पञ्यारत्नं नं थःथःगु नुगःखँ प्वंकाबिज्याःगु खः ।
