भिक्षुणीपिंत नं भिक्षु सरह अधिकार माग
येँ (सन्ध्या टाइम्स)/बौद्ध धर्मय् समर्पित मिसापिनिगु सहभागिताय् 'बौद्ध सम्पदाय् मिसातय्गु योगदान न्हापा व आः' विषयय् छगू गोष्ठी जुल। प्रा. भिक्षुणी धम्मनन्दा (श्रीलंका) मूपाहां कथं झाःगु उगु गोष्ठीइ गुम्ह मिसापिं (भिक्षुणी व उपासिका) पाखें ज्यापौ न्ह्यब्वयेगु ज्या जूगु खः। ज्याझ्वःया उलेज्या यासें मूपाहां भिक्षुणी धम्मनन्दां भिक्षुणीपिंत नं भिक्षु सरह अधिकार दयेमाः धइगु खँय् थःगु बिचाः प्वंकाबिज्यात। थुकिया लिसें बुद्ध धर्मया वास्तविकता थुइके फुसा जक धर्म रक्षा याये फइ धइगु खँ नं वसपोलं कुलाबिज्यात ।
भिक्षुणी डा. धम्म विजयां (श्रीलंका) भिक्षुणी संघयात मान्यता बीमाः धयाबिज्याःम्ह न्हापांम्ह भिक्षुणी स्वयं गौतमी प्रजापति हे खः धकाः कनाबिज्यात। बुद्ध संघय् भिक्षु-भिक्षुणी व उपासक-उपासिकापिनिगु महत्व आपालं दु धकाः नं वसपोलं कनाबिज्यात। ज्याझ्वलय् भिक्षुणी नेतत्वी, लोचनतारा तुलाधर, चन्द्रकला घिमिरे, मि. केसावती व मि. कुसुम, डा. सुमन कोमल तुलाधर, मि. जाम्याङ वाङमो, डा. रञ्जना बज्राचार्य व म्यारोल दुहमिपिंसं ज्यापौ न्ह्यब्वयादीगु खः। ज्याझ्वः नागार्जुन इन्स्टिच्यूटया नायः मीनबहादुर शाक्यया सभापतित्वय् खः ।
